الأربعاء، يناير 11، 2012

حكم رحمية


يلا هدية مع كل حكمة ليمونة :)

رحمة حجة
  
حكم رحمية.. هي استنتاجات واقعية نتيجة تجارب، واسمها "رحمية" أي نسبة إلى رحمة، كاتبتها :))

 (1)

لما باب دارنا مسكر بفوتهاش شمس، فبِضل باردة وعتمة، ولما بتفوتها الشمس بشوف أشيا مختلفة حتى بَكشف الغبرة اللي مخبيها الظل.. ومن ناحية تانية في أجزاء ببين جمالها لما الشمس تسلط شعاع فيها.. ولما بَطلع بتفاجأ بحس إني عايشة في مكان تاني، وكمان بفوتهاش هوا فبِضل ساكنة، بنشعرش كيف برا عم تتحرك الدنيا، فالبني آدم متل دارنا، بنفعش يضل مسكر عحاله.. بشوفش حاله إلا قبال حاله، وحوار ذاته بكفيش يعرف ذاته والغبرة اللي مغبشة ع نقاط فيه، وكمان بعرفش شو في جواتو أشيا حلوة فبحسش بمتعة انو يكون سعيد فيها ويبرزها، وبضل نقاط باردة فيه بتحتاج شوية دفا، وانفعال وتفاعل.. باب دارنا كبير، بس بنفتحوش كله!


(2) 

بجوز يفهمنها البنات أكتر/ وانتي بتجلي عادة آخر اشي بتجليه هو أول اشي بتنضفيه من الرغوة بالعربي "بتلحيه" وهاد مش عدل لانو الجلي اللي قبلو منتظر من وقت، تماما متل الخريجين الجداد اللي بشتغلوا قبل القديمين.. همي اخر اشي بتخرجوا وأول اشي بنلحوا.. عفوا بشتغلو وهدولاك خليهم اللي استنى سنة بستنى سنتين!


(3)



البني ادم اللي بخليكي تكتبي عشانو وتضلي تدوري في موضوع واحد متل "الشوق" و"الغياب" وبتطولي وانتي تكتبي في ذات الموضوع معناتو ما فادكيش بعلاقتكم حتى على مستوى تغيير موضوع الكتابة، بالتالي نصيحتي.. غيريه!


(4)


وجود المصححات أو ضرورات تفادي الأخطاء يخلق الأخطاء، متل ما بحكوا تبعون علم الانسان "الوجود بالآخر" تقريبا، يعني ازا قاعد/ة بتكتب/ي بقلم حبر وجمبك تبكس(طمس) 95% رح تتخربش/ي بالكتابة وازا ما عند تبكس ما رح تتخربش/ي بنسبة 95%، وازا قاعدة بتتمنكري وجمبك الأسيتون 95% يتطرطش مناكير حوالي الاضفر وازا خالصة علبة الاسيتون 95% رح يطلع مناكيرك ألف وازا بتعمل/ي بقهوة وفرشت/ي محرمة تحت الغلاية 95% رح تفور القهوة وتنكب، وازا ما فرشت/ي 95% ما رح تفور.. والخيارات كثيرة.

(5)


ال Gmail بصعوبة تا يدخل على حسابي لما بكون الاسم والباسوورد صح بينما ازا كتبت واحد منهم غلط دغري بأقل من ثانية بصير المربع أحمر وبتعرف عالخطأ دغري.. لإنو فشي أسهل من العوَج بينما الصح طريقه صعبة تيرارارتيراراراراااااااا..

هناك 4 تعليقات:

Um Ommar يقول...

يخرب شيطانك يا بنت
منينلك هالأفكار
لك ,, تحشيشششششششش
ههههههههههههههههههههه

خصوصي الجلي والخريجين
لوووووول

متى بيوصلني كيلو الليمون ؟؟

رحمة محمود يقول...

ههههه انتي عطيني عنوانك وببعتلك كيلتين ;)

Um Ommar يقول...

عمان
اخر الطلوع
قبل ما تهنج السياره او تلنص معك

صباحك خير

رحمة محمود يقول...

:)) خلص إجاكي
هسة ببعتلك ايمل ملان ليمون :P